རྩིས་རམས་པ་བསམ་འགྲུབ་རྒྱ་མཚོ་ནི་སྤྱི་ལོ་1923ལོར་མདོ་སྨད་ཅོ་ནེ་རྫོང་སྲས་གཙང་ཡུལ་དུ་འཁྲུངས། དགུང་ལོ་11་པར་བླ་བྲང་བཀྲ་ཤིས་འཁྱིལ་ནས་རབ་ཏུ་བྱུང་སྟེ་ཀྱཻ་རྡོར་གྲྭ་ཚང་གི་ཆོས་སྒོར་ཞུགས་ཤིང་ཨོ་འཁྱིལ་སྐལ་བཟང་ལེགས་བཤད་སོགས་ལ་བསྟེན་ནས། སྐར་རྩིས་དང་རྒྱ་རྩིས་སོགས་ཐུན་མོང་རིགས་གནས་ལ་སློབ་སྦྱོང་བརྩོན་མཛད།
དགུང་ལོ་19པར་ལྷ་སར་ཕེབས་ཏེ་དགའ་ལྡན་བྱང་རྩེ་གྲྭ་ཚང་དུ་ཞུགས་ནས་ལོ་གསུམ་གྱི་རིང་དུ་བསྡུས་བློ་རྟགས་གསུམ་དང་གྲུབ་དོན་ས་གསུམ་སོགས་ལ་སློབ་སྦྱོང་ནན་ཏན་མཛད་ཅིང་། དགའ་ལྡན་ཁྲི་ཐོག་94པ་ལྷུན་གྲུབ་བརྩོན་འགྲུས་ལས་བསྙེན་རྫོགས་ཀྱི་སྡོམ་པ་ཞུས་ཤིང་དགུང་ལོ་22པར་འབྲས་སྤུངས་སྒོ་མང་གྲྭ་ཚང་དུ་ཞུགས་ནས་ལོ་བདུན་གྱི་རིང་དུ་གཞུང་ཆེན་བཀའ་པོད་ལྔ་དང་གསང་སྔགས་བསྐྱེད་རྫོགས་ཀྱི་ཆོས་སྐོར་ལ་སློབ་སྦྱོང་མཛད་། པས་མཁས་པར་གྱུར། དགུང་ལོ་29 སྟེང་ལྷོ་ཁའི་འོལ་ཁ་ཆོས་ལུང་སོགས་སུ་ཕེབས་ནས་སྒོམ་ཉམས་ལེན་གནང་།དགུང་ལོ་31 ཕྱིར་བླ་བྲང་བཀྲ་ཤིས་འཁྱིལ་དུ་ཕེབས་ནས་ཡོངས་འཛིན་གསང་ཁོག་འཇིགས་མེད་རྒྱ་མཚོ་དང་། དགེ་བཤེས་བསྟན་འཛིན་རྒྱ་མཚོ་སོགས་ལས་རྒྱུད་སྡེ་བཞིའི་དབང་ལུང་ཁྲིད་གསུམ་གསན་པས་གདམས་པའི་གཏེར་མཛོད་དུ་གྱུར།

དགུང་ལོ་36 བླ་བྲང་ཟ་གཡུ་སྡེ་བའི་ངལ་རྩོལ་དུ་ཞུགས་དང་སྡེ་བའི་རྩིས་གཉེར་བ་གནང་། དེ་དུས་ཟོན་པན་ཞེས་པའི་རྩིས་གཞོང་གི་ཐོག་ནས་བསྒྱུར་བགོད་སྣོན་འཕྲི་སོགས་ལ་ཐོགས་མེད་དུ་འཇུག་ཅིང་། ལོ་ཉི་ཤུའི་རིང་དུ་སྐར་རྩིས་རིག་པའི་སྟོང་འཇུག་ཞག་གསུམ་སོགས་ཀྱི་སྐོར་ལ་ངེས་པ་རྟིང་ནས་རྙེད་དེ། གྲངས་གནས་དྲུག་ཅུའི་བར་དུ་འབྱོངས་ཚད་ཐོན་པར་མཛད།
དགུང་ལོ་57་བར་སི་ཁྲོན་ཁྲེན་ཏུའུ་ལ་ཕེབས་ནས་བོད་རྒྱ་ཚིག་མཛོད་ཆེན་མོའི་ལས་གཞིའི་ནང་དུ་ཞུགས་ཤིང་གནམ་རིག་སྐར་རྩིས་སྐོར་གྱི་བརྡ་ཆད་དག་ལ་མཆན་འགྲེལ་མཛད་པ་དང་། ལས་ཞོར་དུ་མཁས་དབང་དམུ་དགེ་བསམ་གཏན་ལས་སྒྲ་རིག་པ་སོགས་རིག་གནས་སྐོར་གྱི་དཔེ་ཁྲིད་མང་དུ་ཞུས་པས་ཀུན་བཏགས་ཀྱི་མཚན་ལ་ཚངས་སྲས་དགྱེས་པའི་ལང་ཚོ་ཞེས་གསོལ།
དགུང་ལོ་62 པར་སི་ཁྲོན་མཛོད་དགེ་བཞག་སྡོམ་སྤང་ལྗོངས་སུ་ཟླ་བ་གཉིས་ལྷག་ཙམ་གྱི་རིང་དུ་སྐར་རྩིས་ཀྱི་ཟབ་སྦྱོང་འཛིན་གྲྭ་བཙུགས་པ་ལ་སློབ་ཁྲིད་གནངས་པ་དང་། དགུང་ལོ་63་ སྤྱི་ལོ་ 1985པར་ནུབ་བྱང་མི་རིགས་སློབ་གྲྭ་ཆེན་མོའི་སློབ་ིགཙོ་གཞོན་པ་སྙིང་བོ་རྒྱལ་གྱིས་བོད་ཀྱི་སྐད་ཡིག་སྡེ་ཁག་ལ་གདན་འདྲེན་ཞུས་ཏེ་དགེ་རྒན་ཆེན་མོའི་ལས་ཐོབ་ཕུལ་བ་དང་། ཞིབ་འཇུག་འཛིན་གྲྭའི་སློབ་མ་15ལ་སྒྲ་རིག་པ་དང་སྐར་རྩིས་རིག་པ་སོགས་ཀྱི་སློབ་ཁྲིད་གནངས། དགུང་ལོ་64 སྤྱི་ལོ་1986པར་མཚོ་སྔོན་སློབ་གསོ་སློབ་གླིང་གིས་གདན་འདྲེན་ཞུས་པ་ལྟར་ཕེབས་ནས་དགེ་སློབ་ཡོངས་ལ་《རིགས་ལྡན་མཆོད་པའི་འོད་སྣང་》དང་། 《 རིགས་ལྡན་སྙིང་ཐིག་》།《མཱ་ཡང་རྒྱ་རྩིས་སྙིང་བསྡུས།》སོགས་སློབ་ཁྲིད་གནངས།  །
དགུང་ལོ་68་བར་སྤྱི་ལོ་ 1990 པར་པེ་ཅིན་ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་གིས་གདན་འདྲེན་ཞུས་པ་ལྟར་ལོ་གཅིག་གི་རིང་དུ་ཉིད་ཀྱིས་མཛད་པའི་《སྐར་རྩིས་ཀུན་འདུས་ནོར་བུའི་》སྟེང་ནས་རྩིས་ཀྱི་ལག་ལེན་དང་གོ་དོན། མཇུག་གི་རེའུ་མིག་འཛིན་ཚུལ་སོགས་ཞིབ་རྒྱས་ཀྱིས་སློབ་ཁྲིད་གནངས།། དགུང་ལོ་73་བར་ སྤྱི་ལོ་ 1995 པར་ཀན་སུའུ་ཞིང་ཆེན་གཙོས་མི་རིགས་དགེ་འོས་ཆེད་སྦྱོང་སློབ་གྲྭས་ཀན་ལྷོའི་དགོན་ཁག་སུམ་ཅུ་ལྷག་གི་གྲྭ་པ་མོས་པ་ཅན་རྣམས་བསྡུས་ཏེ་སྐར་རྩིས་ཀྱི་འཛིན་གྲྭ་བཙུགས་པར་ཕེབས་ཤིང་།  《 སྐར་རྩིས་ཀུན་འདུས་ནོར་བུའི་》ལག་ལེན་དང་གོ་དོན་ཞིབ་རྒྱས་སློབ་ཁྲིད་གནངས་སོ། ། དགུང་ལོ་74(1996) པར་སི་ཁྲོན་ལྷོ་ནུབ་མི་རིགས་སློབ་གྲྭ་ཆེན་མོས་གདན་འདྲེན་ཞུས་པ་ལྟར་ཕེབས་ ཤིང་། དེ་གར་ཕྱོགས་སོ་སོ་ནས་གྲྭ་པ་མོས་པ་ཅན་མང་པོ་བསྡུས་པ་ལ་ལོ་གཅིག་གི་རིང་དུ《སྐར་རྩིས་ཀུན་འདུས་ནོར་བུའི་》གོ་དོན་དང་ས་རིས་བཅས་པ་རྒྱས་པར་སློབ་ཁྲིད་གནངས་ཤིང་། དགུང་ལོ་ 83(2006) པར་བླ་བྲང་བཀྲ་ཤིས་འཁྱིལ་དུ་དགོངས་པ་ཆོས་དབྱིངས་སུ་འཐིམས་སོ།  །